jueves. 28.03.2024

PRIMEL ANIVERSARIU de Serra de Gata Digital

Franjo Antúnez, presidente de la Asociación de Senderistas de Sierra de Gata y colaborador de este diario considera que  a inmediaté das noticias, as posibilidais informativas, a difusión que se multiplica con as chamás “redis sociais”, y a agilidai de Sara con la colaboración de cualquer pesoa (ya son mutas) facin posibli que teñamus noticias de coixas que pasan, inclusu antis que otrus medius de difusión con mais poderiu economicu
Franjo Antúnez Navais, colaborador de www.sierradegatadigital.es
Franjo Antúnez Navais, colaborador de www.sierradegatadigital.es

Cuandu a punta da tijeira empezaba a trazal us primeirus recortis, supoñendu que fora esi u motivu, desapareceu casi sin despedilsi “La Crónica de Sierra de Gata”. Pa mutas pesoas foi tristi y un poicu dolorosa a pérdida. Nunca habíamus tiu un mediu de difusión comarcal que chegara a tos us lugaris da serra y ya estaba implantau de tal maneira que a xenti preguntaba pur u periódicu nus Ayuntamentus, nas bibliotecas públicas y nus sitius ondi habitualmenti se repartía.

Non eran artículus de muta profundidai, aunque non faltaban plumas muy interesantis que con noticias de tos us lugaris gustaban a mayoris y a jóvenes y a tos vuscábamus informacions du nosu lugal ya foran sobre asuntus municipais, deportivus, curiosus o de cualquer tipu. Tiñamus actualidai sobre proyectus e inversions de organismus públicus da serra, pudiamus cuñucel a u alcaldi das Ellas o a u de Gata, tiñámus tamen noticias de pesoas mayoris y das festas de tos us lugaris ademais de información deportiva y mutas otras coishas mais.

Supoñú que u costi era importanti pas arcas comarcais y u proyectu por desgracia morreu, comu logu están morrendu otrus mutus que tamen eran interensantis.

Pero a solpresa foi cuandu a valentía de Sara Fontan, verdadeira alma y artífici du anteriol periódicu, a levó a inicial esti proyectu profesional de maneira individual, arriesgandu u sei diñeiru y u sei esforzu, aunque agora a publicación se presenti en formatu digital, usandu us medius modelnus que facin posibli un-a publicación muy interesanti, actualizá día a día y que se apoya na-s novas redis sociais.

Esti novu formatu, aunque sabemus que mutas pesoas, especialmenti xenti mayol que non accedi a internet, ten mutas posibilidais y se está consolidandu comu un-a referencia informativa sobre tos us asuntus que sucedin na comarca da Serra de Gata. A inmediaté das noticias, as posibilidais informativas, a difusión que se multiplica con as chamás “redis sociais”, y a agilidai de Sara con la colaboración de cualquer pesoa (ya son mutas) facin posibli que teñamus noticias de coixas que pasan, inclusu antis que otrus medius de difusión con mais poderiu economicu. A mei modestu entendel, istu é progresu y desarrollu pa un-a comarca comu esta nosa que temus que construil entre nos, porque que as ajudas de fora cada ve van a sel mais escasas y Serra de Gata Digital facilita a información de maneira libri, sin dependencias ni ataduras de niñun tipu y dondi as portas sempris están abertas a cualquel manifestación literaria, cultural o de cualquel otru tipu.

Enhoraboa pur esti anu cumpliu, seguru que con mutu esforzu, con momentus difícilis que han podiu acabal pa sempris cun esti mediu informativu que un-a pesoa a consiguiu sacal pa dientri y con a que debemus de colaboral tos us que podamus, porque seguru que será un-a forma de benefical a us habitantis da Cormarca.

Gracias Sara, mutu anímu y gracias tamen a tos us colaboradoris y empresas que aportan u sei graninhu a esti gran proyectu.

PRIMEL ANIVERSARIU de Serra de Gata Digital