viernes. 29.03.2024

Us alumnus d’u Val de Xálima se muvilizan pur u novu centru

Us alumnus d’u IESO Val de Xálima son cá vé mais conscientis d’as carencias que preshenta u sei centru iducativu i pur ilu han dicidiu sumalsi a’s recramaciós que pairis i culuctivus sociais de “Us 3 lugaris” convocan desd’a prataforma “IESO Val de Xálima. Por nuestro Centro Educativo”.

Pa’ algús pueu risurtal sorprendenti vel a decenas de jóvinis alumnus protestandu anti a Asamblea ixtremeña u pasau 8 de noviembri, sujetandu firmimenti as pancartas in defensa d’u sei novu centru, baishu unha incesanti lluvia. A u ver esta acción mus demus conta d’u sei grau de concienciación, purque nun sólu us alumnus du institutu foran a reivindical us seis dereitus, si non que tamén puimus ver a us mais pequenus, mininus i mininas de primaria gritandu hasta disalsi as gargantas, in primeira fila.

Nun les dibiría sorprendel demasiau esta acción, si coñoceran de cerca a su forma de pensar sobri tó esti tema. Pa’ isu, hemus sondiau as sus upiniós i qué les leva a esta muvilización. As respostas ubtiñías mus mostran que éstis, aunque parezan aishenus a’s dificiencias du centru, son mui conscientis d’as carencias que preshenta. Así, u sel priguntaus, tós cuincidiran in’ a importancia de dispuñer tantu de instalaciós vitais –enténdasi: sellas de emergencia (ventanas sin reisas) i alarmas de incendiu, laboratoriu, pabellón pulidipurtivu integrau dentru d’u ricintu iscolar, patiu mais ampliu i cun zonas in as que risguardarsi us días de agua, salón de actus, biblioteca mais ispaciosha o taller tecnológicu- cumu de oitrus elementus menus importantis, pero á vé preshentis n’u sei día a día: bancus ondi sentalsi, baldosas du solu que nun se movan pa’ nun esperrialsi cuandu istén mollás, solu mais u menus rigulal ondi nun se folmin tantus charcus ni s’inundi tan a minú, etc.

In cuantu a’s sus expectativas de cómu siría u sei novu centru, contestorin que isperan sintilsi mais sigurus, u istar n’un ambienti menus piligroshu, i que dibiu a istu, haia unha mallol caliai in’a enseñanza i pollan obter un millol nivel pa’ puel defendelsi cun mais faciliai a’ hora de cuntinual cun us seis istudius fora d’u sei lugal. U’s alumnus les gustaría tel clasis prácticas, ia que pensan que sirían mais intritias, cumprindirían mais claramenti us conceptus tióricus i isu us levaría a un incrementu in’a aplicación n’us istudius. Tamén creen, que dispuñel de tós estas instalaciós milloraría a cunvivencia, ia que habría mais ispacius pa’ fomentala, se fairían mais celebraciós i nun habría tantas discusiós pur’us golpis i pishotós a’ hora de intral i sel pur as istreitas portas d’us pabellós.

U’ pidili opinión sobri u sei respaldu a muvilización, a inmensa malluría istá a favol. Us alumnus d’U Val de Xálima comentan que apoiándua istán defendendu us seis dereitus i intentando que con ilu, ademáis, pollan cunsiguir bineficius p’a su iducación. Didin que nicisitan unhas novas instalaciós que cumplan cun a normativa; i protestan pur a dimolición d’as sus pistas polidipurtivas anterioris, ondi diban a ishugar tolus días.

A través d’as respostas que estis jóvinis mus ofrecin, vemus que son mui conscientis d’as carencias que preshenta u sei centru iducativu i que a su invulucración é cá vé mallol.

Us alumnus d’u Val de Xálima se muvilizan pur u novu centru