U mes octavu dus romanus, OCTUBRI.
Comu ya cuñucemus u Cuadru de Pegaso (cap.12), podemus usalu de referencia. Un-a das suas estrelas nun le perteneci, sinon que forma parti de Andrómeda (cap.11), ALPHERATZ (u ombligu du cabalu). U 1 de octubre, as 12 da noiti, está un poicu mais de 3 palmus sobre Pozuelo de Zarzón. Andrómeda ten un-a característica línea recta formá pur Alpheratz, MIRACH (nomi de un-a prenda que se pon na cintura), a dois palmus y mediu sobre Villanueva de la Sierra, y ALAMAK (animal pareciu au tejón), un poicu mais abaishu y sobre Torrecilla de los Angeles.
Pero u objetu mais famosu desta constelación nun é un-a estrela, sinon un-a galaxia, a NEBULOSA DE ANDROMEDA, M31, que é u objetu mais lejanu (2,2 millons de anus-luz) visibli a simpli vista, comu un-a mancha difusa a un-s 3 palmus sobre Hernán-Pérez.
Casi mordendu un-a parti du Cuadrau istán us dois pecis de Pisces (cap.14), de estrelas poicu brillantis. Un cerca de Mirach, y u oitru, por denbashu du Cuadrau, folmandu un grupu chamau LA RUEDA, a 2 palmus y mediu sobre a zona de Calzadilla. A estrela mais cuñucía de Pisces é AL RISCHA (a corda), u nú que uni as duas cordas as que están atas us pecis, a un poicu mais de un palmu sobre Villa del Campo.
Por debashu de Pisces se falla Cetus (cap.14), a ballena disposta a devoral a Andrómeda. A sua cabeza ten forma de pentágonu irregulal y en ela está MENKAR (a narí), a un poicu mais de un palmu entre Santibañez el Alto y Pozuelo de Zarzón. Na cola, cerca das aguas que derrama Acuario (cap.13), está DENEB KAITOS (a cola da ballena), un poicu a isquerda de Calzadilla y a un palmu y mediu. Pero a estrela mais famosa de Cetus é MIRA (a maravillosa), pur a mitai du cuellu y cerca du nú de Pisces. Comu a sua magnitu varía entre 3 y 10 au largu de 11 mesis, nom sempris é visibli, pero se falla poicu mais o menus a un palmu entre Villa del Campo y Guijo de Galisteo.
Y hasta u mes próximu.