VI.Noviembri nu ceu da Serra


Sexta entrega das miniguias pa observacion astronomica en Serra de Gata feitas pur u nosu colaboradol M42. Un mes mais, noviembri, que pode mus alcanzal mirandu as estrelas a un publicu mais ampliu. Jakky Cosway traduci a miniguia a u ingles, Hans Schnyder nus acerca a us lectoris alemans y Franjo Antúnez nus ajuda a difundil a fala mirandu a u ceu serranu

 

.-

Aries
Aries

U novenu, NOVIEMBRI.

Oscuridai entre duas lucis nocturnas, u Gran Cuadrau de Pegaso, que se afundi nu Atlánticu, y us brillantis Tauro y Orión, emergendu pur u Mediterráneu.

Pero algu podemus vel. Son as 11 da noiti du primel día desti mes. Aries (cap.18), por debaishu de Andrómeda y a izquerda de Pisces, ten cerca de esta última us cornus, cun as duas estrelas mais brillantis: HAMAL (u cordeiru), a tres palmus sobre Guijo de Galisteo, y SHERATAN (u signu), a poicu mais de tres palmus y un poicu hacia a dereita.

Entre Aries y Andrómeda está u Triángulu (cap.18), cuya estrela principal e METALLAH o CAPUT TRIANGULI (a cabeza du triángulu), a poicu menus de tres palmus y mediu, y hacia a dereita de un dus pecis, está M33, a terceira galaxia mais visibli du Grupu Local, a u que perteneci tamen a nosa Vía Láctea.

Y a última constelación pa esti mes: Perseo (cap.9), u liberadol de Andrómeda, que agora está por debaishu dela y a isquerda de Aries. Duas estrelas destacan, ALGENIB (u lau), chamá tamen MIRFAK (u codu), a un poicu menus de tres palmus y a mitai de camiñu entre Robledillo de Gata y Torrecilla de los Àngeles, y ALGOL (u demoniu), a tres palmus sobre Hernán-Pérez. Ten esta constelación un famosu cúmulu dobli chamau a EMPUÑADURA DA ESPÁ, y formau pur NGC 869, a un poicu mais de tres palmus sobre Torre de Don Miguel, y NGC 884 pegau a sei compañeiru, pero un poiquininu mais abaishu.

Y nus vamus acercandu au final du anu.