jueves. 28.03.2024

Oi me án llegauunus pueminas, desdi Badajó, por mé del su autol, Juan Francisco Reina Raposo, que vos endilgu paí, pal regorzu los vuestrus pensaris i relaju delos cuelpus, entallaus cumu están enestus tiempos d´agora, tan gediendus i aginaus. 

Un escrivienti en puesía i prosa, que jue redatol de la bitacora “Ñíu mielrus” i del que se puen encontrar cosinas de mucha caliá pal escrivieru literariu estremeñu en “Calambucu”, assín cumu envestigacionis i divurgacionis de la nuestra lengua estremeña en “Puebru castúu”, cumu sitiu tamién d'enformacionis a tentu dela ralidá estremeña i en defensa delos enteressis del nuestru puebru, acontiná pol facebook.

Sostribáu nestus meyus dedica parti del su tiempu a envestigal el estremeñu enos andaris dela lengua, mitología i música. Por mé del su blogui, “Ñíu mielrus” espusu endilgus de tema lingüísticu o social i parti del su material literariu. Comu escrivienti, es sobressalienti el su versu ligeru i rítmicu, gastandu dun léssicu abondosu. Los temas delas sus poesías ahondan eno social, peru tamién eno ventual i passanti, siempri con evocaol lirismu i almiración

D´él se tien dichu en “Cuyu pan esgarras?” que: “Con un feitíu modernu, cenzillu i delicau, esti escrivienti nuevu espón testus cortus, cuentinus, aforismus entre lo filosóficu i lo literariu, cudiandu muchu del sentíu delas palabras, peru cona naturalidá que brinda el frujil estremeñu”. 

Puebru
Puebru nuevu, puebru jovi

que no sabi que á essestíu:

enxareta la concencia

 delo que te s'á perdíu.


Recuerda-ti del caminu,

condura-lu a mantenienti,

ahila sin perdel tinu,

poni hondu la simienti.


Entanguila la tu essencia,

inagura el tu huturu.

Con tentigués, con pacencia

avienta tol humu escuru.


Derrota la bota fiera

con arrepíu de gloria.

Vieja gloria i gloria nueva,

comuelgu dela tu Estoria.

Acaná

Acaná la derrengueta

se prossima, i çocotrea

acuerdus en tenguerengui

que el pensamientu acarrea.


Mos da huerça el confial-mus

dun mañana que no llega,

en recadandu en frasquinus

dies mil lárimas azeas.


Da en sí el sol, peru las almas

que penan polas caenas

s'acogutan en rinconis

duna alcoba desajena.


Prendi el huegu del deseu

l'ánima horra. Que duela!

Que sedrá la lumbri esta

la que prenda negra tela!

El canteal-si


"El canteal-si le cuerta

las alas al pensaeru

i afecha de tó la puerta

del caminu verdaeru".


Assín palra el sabihondu

con espeldi fachendosu,

cona andorga bien enllena

dendi'l palaciu de oru.


Sepa usté que los acuerdus,

antis que de voluntá,

nacin de cabeças vivas

conas panças merendás.


No sedrá el señol tan sabiu

si no á dau en abrigual

que l'espíritu no es libri

quandu ena mesa no ai pan.

Nota.- Imagin entitulá “Puebru”, púbrica porel Juan Reina en “Puebru Nuevu”.

Este diario lo hacemos todos. Contribuye a su mantenimiento

ING Direct - Sierra de Gata Digital
Nº CC ES 80 1465 010099 1900183481

Juan Francisco Reina Raposo