EL REÚTU DELA LITERATURA EN ESTREMEÑU

Unus poeminas de Cruz Díaz Marcos

Hoy quiero traeros al “Reútu dela literatura en estremeñu” a un poeta contemporáneo cercano. Se trata de Cruz Díaz Marcos. Poeta de Casillas de Coria (Caçris) (n. 1955).

Tiempo de rosas extremeñas
Tiempo de rosas extremeñas

Pubricó las sus primeras poesías en “Seis y siete”, suprementu semanal del pedióricu Hoy. Por Luis del Olmo, en Radio Nacional i en otras emissoras d’arradiu, se leyerun angunas delas sus pieças. Colavoró enas revistas literarias Clarín i Gemma de Aranguren (Biscaya). 

En 1980 hue finalista dela 4a edición del‘Premio de Poesía Ruta de la Plata’con el poema entitulau «Solo ante la belleza». Al sotru añu, ganó la V edición de dichu premiu con el poema «Desde el mudo temblor de la esperanza». 

Enos añus 1991i1992 ganó los premius de poesía ‘Ciudad de Coria’. En 2002 l’atorgarun el 2u premiunel concursu de relatu cortu ‘San Juan 2002’, con «Monólogo del ruiseñor». Tamién ganó el‘Concurso de Poesía 2002’ convocau pol ayuntamiento de Calçaílla conel sonetu «Catedral de Coria». Á síu ganaol del 3u concursu de poesía ‘Ciudad de Jerez’, en Xerés delos Cavallerus, en el andal de sonetu crássicu. 

Parti dela su obra á síu pubricá en destintas antologías i obras poéticas i literarias de Estremaúra, Cataluña i País Vascu. Por contra, la obra en estremeñu apaeci nel blogui d’él “La gajá del jurréu”. A pubricau en “La Nueva Literatura en estremeñu 2” (OSCEC 2012).

GRITU ESTREMEÑU

Arrempujandu sentiris,

aventandu las querencias,

abriendu los nuevus surcus

de esta nueva sementera,

vamus palantri, estremeñus,

enanchandu las vereas,

abriendu vuelus al monti,

danduli riegu a la siembra.

Semus un pueblu que sufri,

semus un pueblu que sueña,

semus un pueblu cansau

de estal callau a la espera,

en los surcus del trabaju,

los jrutus que nunca llegan.

Dejemus de estal quietinus

cumu sombrajus de siesta

i farrunguemus de golpi

la hiel de la vestimenta.

¡Vueli en el aire la antigua

sed de la sangri estremeña

i sueni con rabia el gritu

del llantu de nuestra tierra!.

ASSÍN QUIERU YO PALRAL

Comu palravan mis pairis

i endinantis mis agüelus,

comu la genti palrava

enos campus i enos puebrus

comu se izían las cosinas,

los amoris, los requiebrus,

con essi jeitu que tienin

los sentiris estremeñus,

assín quieru yo palral,

dizil las cosas que sientu

con essi sentil tan hondu

que tieni esti puebru nuestru,

assín quieru yo cantá-li

cosinas ducis en versus

a esta tierra de mi sangri,

que m’enllena si la mientu,

assín quieru yo palral,

con el mesmu sentimientu,

conas mesmas palabrinas,

i conos mesmus acentus:

igual que antañu palravan

mis pairis i mis agüelus.

 

LA HUERÇA L’EMPEÑU

 Alos antiguus labraoris estremeñus

M’acuerdu d’aquel puebru chiquininu

ondi a mí m’endilgarun la nacencia,

ondi tuvun los probis la esperencia

de callal entre sulcus de continu.

 

M’acuerdu delos viejus ya cansinus,

mancornaus enos poyus dela cencia,

desliandu el sentil dela concencia

d’aquel hondu vivil de sus destinus.

 

Ombris nuestrus, antiguus labraoris,

que sembrarun la tierra i la regarun

cona huerça del sol de sus suoris.

 

Estremeñus que siempri se callarun,

supiendu que ena boca los señoris

se faratava el pan que ellus sembrarun.

 

 

 

 

 

Este diario lo hacemos todos. Contribuye a su mantenimiento

ING Direct - Sierra de Gata Digital
Nº CC ES 80 1465 010099 1900183481