Imprimir

Un grupu de falantis se propon ficel un-a asociación pa protegel y difundil a Fala

Franjo Antúnez Navais | 05 de abril de 2013

Torre campanario en San Martín de Trevejo
Torre campanario en San Martín de Trevejo

Son profesionais da educación, u patrimoniu, funcionarius públicus e investigadoris, que partindu de u caracter patrimonial da Fala buscan a sua consolidación y crecimentu.

U 20 de marzu du anu 2011, u gobernu da región declaró A Fala - lengua que se fala en Valverdi du Fresnu, As Ellas y San Martín de Trevellu- Ben de Interés cultural na categoría de intangibli. Desde entoncis, poicu mais han feitu as autoridais regionais, pa recuñucel, preserval y difundil esti "tesoiru da humanidai", comu recentimenti u definiu u profesol da Universida de Vigu, Xose Henrique Costas, estudiosu da lengua.

Si ben ya existi un-a asociaciónh denominá Fala I Cultura cuyu objetu é A Fala, un grupu de falantis dus tres lugaris a iniciau u camiñú pa creal un-a nova asociación con un tripli objetivu: Rescatal toa a documentación que exista sobre a Fala, prestigial u idioma en as suas tres variantis (valverdeiru, lagarteriu y mañegu) y difundila.

U grupu de traballu recen constituiu recuñoci "a importancia du papel que xugó a asociación Fala y Cultura a finais dus noventa. Sin embargu, a creación de esta nova asociación pretendi partil de ceru, sin influencias externas a us tres lugaris, delcara a Sierra de Gata Digital un-a das pesoas que participó en esta primeira reunión. Us falantis que tomaran parti en esta primeira reunión compartin us temoris du profesol galegu en cuantu a "castellanización" de a Fala entre us jóvenes. Por isu consideran necesariu "intruducil a fala un-a ve mais nas aulas con u fin de fijal a terminología original du idioma frenti a castellanización das palabras antiguas o du novu vocabulariu", comentan.

A nova asociación, pendienti aun de denominación y estatutus, pretendi elaboral "un proyectu de gran envergadura enu que se contemplin tos us antecedentis du idioma y seis estudiu e incluya un-a relación de toas as actividadis que se van a ficel".

Participal en ferias y seminarius de lenguas minoritarias, comu u que proximamenti tendrá lugal en Minde (Purtugal), introducil a fala nas encostas, leval a cabu accions intergeneracionais y luchal contra a castellanización du idioma, son algun-as das propostas que están encima da mesa.
A intención desti grupu de traballu é mantel reunions mensuais. A próxima está previstu que se celebri u día 6 de maiu.
 
 

Puede ver este artículo en la siguitente dirección /articulo/a-fala/-un-grupu-de-falantis-se-propon-ficel-un-a-asociacion-pa-protegel-y-difundil-a-fala/20130405081010009353.html


© 2019 Sierra de Gata Digital