Us nomis desti mes y us siguientis non necesitaran muta imaginación. Hubu un tempu enu que us romanus empeazaban a contal u anu enu mes en que renaci a naturaleza y u tempu volvía a sel propiciu pas suas campañas guerreiras de conquista: Marzu. Si vamus contandu a partil de él, u nosu mes ocupa u lugal númeru seti, é u séptimu, é SETIEMBRI. A Vía Láctea se retira poicu a poicu da parti central dus ceus y to vai oscurecéndusi. É u momentu da irrupción du Gran Cuadrau de Pegasus, heraldu du otoñu, que esti aun tendrá u equinociu u día 22, alrededol das 11 menus cuartu da noiti.
A 1 da madrugá de u 2 au 3 de setiembri. Entre Villa del Campo y Guijo de Galisteo, a poicu mais de dois palmus, está ALGENIB (u ala), un-a das estrelas du Gran Cuadrau (cap.12)- recordemus que a cuarta perteneci a Andrómeda (cap.11). Casi na misma situación, pero a tres palmus y mediu, está SCHEAT (u hombru), y a poicu menus de tres palmus, sobre Morcillo, está MARKAB (a silla). Ya longi, señalandu un dus extremus da constelación, está ENIF (a nari), a tres palmus, entre Coria y Casas de Don Gómez.
Encima de Pegasus, zigzageandu a u largu da zona que vai de Torre de Don Miguel a Pozuelo de Zarzón, entre tres palmus y mediu y cuatru palmus, vemus a constelación de LACERTA (u lagartu), cun a sua cabeza metía na Vía Láctea.
Vamus a relajal un poicu u cuellu, que levamus ya un ratu mirandu hacia u altu. A estrela principal de 
Aquarius (cap.13) é SADALMELIK (u afortunau du rey), a dois palmus y mediu sobre Coria. A sua izquerda podemus vel, con forma de “Y”, u ANFORA du Aguadol, constituía pur SADACHBIA (a afortuná dus lugaris ocultus), un poicu mais abaju que Sadalmelik, y hacia a izquerda de Coria; ZETA-AQR, enu centru da “Y”, casi a misma altura, pero sobre Rincón del Obispo; prácticamenti encima desta, pero a altura de Sadamelik, está PI-AQR; y nu final du rabillu da “Y”, ETA-AQR, a altura de Sadachbia y un poicu mais hacia Puebla de Argeme.
As aguas du Ánfora se derraman sobre Piscis Austrinus (cap.14), cuia estrela principal é FOMALHAUT (a boca du pez), a un poicu menus dun palmu sobre Rincón del Obispo.
En mutus dus nosus paseus pur us ceus hemus usau comu referencia de observación Santibañez u Altu. Hoixi, desde as estrelas, le mandamus un beixu.
Y hasta u mes que ven...
