¡Y Ya está aquí, a estación que tantu esperábamus! Día 1 as 12 da noiti.
Vamus a empezal pur un-a constelación circumpolal pa nos, e dicel, que, aunque en distintas posicions, 
será visibli to u anu: A Osa Maiol (cap.3), cuiu famosu asterismu é u CARRU formau pur seti estrelas. ALKAID (jefi das plañideiras), a 2 palmus a dereita de Cadalso; MIZAR (u cintu), sobre Cadalso, pero a un poicu menus de 2 palmus i mediu; ALIOTH ( de etimología poicu segura), un poicu mais arriba; MEGREZ ( a rei da cola), a un poicu menus de 3 palmus, entre Cadalso i Torre de D.Miguel; DUBHE ( a osa), a un poicu mais de 3 palmus entre Torre de D.Miguel i Gata; MERAK (u lomu), sobre Torre de D.Miguel, a un poicu menus de 3 palmus i mediu, i, pur últimu, PHEKDA (u muslu), un poicu a dereita de Cadalso i a tres palmus. Memorizal estis preciosus nomis nun é solu un placel en sí mismu, sinu que nus sirvin de ajuda pa localizal a mutas otras estrelas du filmamentu, pur ejemplu, si prolongamus cincu vecis u lau que uni Merak cun Dubhe, podemus encontral a útil pero poicu brillanti ESTRELA POLAR.
Agora le toca u turnu a constelación zodiacal mais visibli esti mes (pur dientri da cual, evidentimenti, nun 
está pasandu u Sol, e dicel, nun e a correspondienti a u signu du zodiacu desta época ): Leo (cap.5). A sua estrela mais brillanti é REGULUS (pequenu rei), a 3 palmus sobre Calzadilla. Tamen destacan DENÉBULA (a cola du león), a un poicu menus de 2 palmus i mediu, mirandu hacia Montehermoso, i ALGIEBA (a melena du león), a un poicu mais de 3 palmus a dereita de Morcillo. U asterismu cun forma de FOICI, que representa a cabeza, se extendi entre Puebla de Argeme i Rincón del Obispo, a un poicu mais de 3 palmus i mediu.
I finalmenti duas constelacions menus famosas: un-a parti da larguísima Hydra (cap.15), na que están a CABEZA, cun forma de circuliñu, a un poicu mais de 2 palmus i mediu a izquerda de Moraleja, i ALPHARD (a solitaria), un poicu a izquerda de Casas de D.Gómez i a 2 
palmus. A otra é u Linci (cap.20), da que solu nus vamus a fijal en ALFA-LYN, a un poicu mais de 4 palmus entre Huélaga i Calzadilla.
U 20 de marzu, as 16:57 en T.U. (ver cap.I desta seri), u Sol nus anuncia u comenzu da nova estación nu hemisferiu norti, ¡ a alegri primaveira !.
I que asina sea.
¿Quieres apoyar la difusión de la fala? ¿Quieres apoyar a Sierra de Gata Digital. pincha aquí
