jueves. 28.03.2024

Las garrasperas i lus desfilis d'Apolu

Quandu diximus que temiamus ala "masificación" delas fiestas, no lo diziamus baldíamenti. Una fiesta pagana que se destacava pol revolutu, la rebujiña i el chungueteu á acabau por envertil-si en tolo contrariu, es dizil, en el ordin, el destraci i la formaliá

Carnavalis de Badajoě. J. Guisado
Carnavalis de Badajoě. J. Guisado

Enos días estus de barulleu, políticas de baratu, almenistración que desfarfalla i pragas que repartin la genti entre las oficinas del paru i las boticas en cata de xarabis i papelillus de nombris repompollúus, el desganu, la derrengueta i la ronquera mos tiran al butacón.

Los del tiempu no atinan conos fríus, las nievis i las aguas, el airi mos çocotrea el cochi que vacula i no poemus retenel el coragi pol que vá guiandu delantri, cambaleandu-si porque está enreandu con el mobi.

Sin entendel cómu el thymos delos griegus mos arrempuxa a buscal-mus faringitis, en desgañitandu-mus pola emoción, atona más, ata queal-mus abobecíus, lo contrariu.

Las garras del braseru i el son del arrascón cona alambrera, el clissamientu dun pograma que palra gaspachás, enque sean un ofendimientu al sel umanu, i, a!, dexal-mus engatusal a trocu dunus minutus d'olvíu.

Qué vida cenzilla la de no tomal atención de ná delo que passa cerca i embaíl-mus con un chinchorreu qualquiera! Cómu poemus tracamundeal la ralidá, más, siquiera opinal d'ella, si mos queamus suspensus a ca no ná i mos dexamus enreal?

Un voluntosu del sigru XXI ataburna uecus de comentarius enas redis socialis i enas tavernas conos amigus has proponimientus, cabecea, desenroa i sostriba ideas, peru cudiau, no dessijamus ná d'él quandu lo precisemus, porque saltará con milenta de propuestas i como cantan los Deolinda, dirán "agora não, que é hora do almoço" o "agora não, que me dói a barriga".

Nos tiempus ondi la palabra ná importa i ni los dicionarius son escapás d'assental los senificaus, namás quea que volvel a sentil el pelleju del tamboril retumbreandu, las vozis delicás delas cantoras i las purificás, el palitroqueu montermoseñu o el rechilbíu delas pantarujas a ardel.

Lo mejol quandu la garganta s'enrita i las palabras pierdin el valol es aguzal el oíu i disfrutal conos sonis que train estas fechas

Comu diría un políticu, "prometu" no palral delos carnavalis. Assinque, amigu letol, no te contaré delas oras d'ensayus enos políganus, ni delos tamboris ena siesta, ni delas mairis a pegal botonis, antejuelas i cañas a destaju. Usté dispensi. Quiciá que lo que más me hurgui a escrevil sea la contradición d'estus días, más que delos días, dela genti.

Quandu estas semanas atrás diximus que temiamus ala "masificación" delas fiestas, no lo diziamus baldíamenti. Una fiesta pagana que se destacava pol revolutu, la rebujiña i el chungueteu á acabau por envertil-si en tolo contrariu, es dizil, en el ordin, el destraci i la formaliá.

Dionisu queó hondeau no sabemus óndi, junta la porra, las carantoñas i las máscaras. El dios Apolu s'alevanta agora trunfal, no cona cítara, sino conos tamboris militaris. I es que es disciplina milital lo que llevamus viendu estus días enos nuestrus puebrus.

Las combarsas, trupis verdaeras apreparandu-si pala campaña, pocu i ná tienin que vel con el revolutu i la mesturiña d'estas fiestas. Tó en ellu es reziu: hormacionis, passus, posturas, música. L'academia delos carnavalis ya abati si recibi más biembrus que alunus enas escuelas i ena alegría dela fiesta compitin cona música comu exércitus enfrentaus. Sacrificiu nel baili, oras ensayandu-si, tardis enteras a componel tragis i empollas enos deus delas cachiporras de tamboris i tubus. L'alegría del eshuerçu ena reziúra dun Apolu que se goza dela proporción, delas carrefilas bien hechas polas callis i del passu firmi nel pisu d'asfaltu.

Demientras Dionisu vivi enos botellonis de pola nochi, acachapau enos kylikes de prásticu. El mostru dela moa al son del tambol i el campanillu revoluciona el frujil tranquilu delos puebrus, retumbandu las parelis, tupiendu las telis, pintandu los pedióricus.

Me preguntu si essi afán enfunciona tan bien precisamenti pola disciplina i la propaganda. Esperamus essi mesmu ardil ena procura dela diniá comu estremeñus?

Retrataura.- “Carnavalis de Badajó”. Detalli duna retrataura de J. Guisado. 2010.

Este diario lo hacemos todos. Contribuye a su mantenimiento

ING Direct - Sierra de Gata Digital
Nº CC ES 80 1465 010099 1900183481

Las garrasperas i lus desfilis d'Apolu