viernes. 29.03.2024

Quandu la tierra llora ceniza

Estamus más entreteníus quitandu la çalea del amigu, juegandu en quartus escurus o tirandu retratus paque julguin si assienta bien el vestíu nuevu mentris que se desgañota la naturaleza

Qué tien esta sociedá loca que mos destina i mos desambienta, desapartandu-mus delo essencial? Perdimus la osservancia, l'almiración cono que mos arroea i, clissaus conas Encina saqueada. Acebo. Azul de Xalima copiabobás que cuentan enas caravas de mobi i las geringonçás delos vidius dela Redi, mos descadecemus del cantíu del mielru ala mañana o la involtura dela chuchuruvía quandu se aposa nel suelu. Mos estamus perdiendu el verdegueu dela toñá enos bancalis, enas cunetas i enas plaeras recinchás de piera. No apreciamus remotamenti el bramíu que pega el ríu quandu corri tragandu las passaeras o si, ya limpiu, enseña al mundu el fondón que se trasluzi ala meyudía.

No osservamus la naturaleza más que quandu mos pega angún sustu: si el troníu hazi temblal las ventanas, si las llamaratás lambin las angarillas o si el esquiletu i la enfermedá s'avançan sobri'l ganau que pasta o los animalis bravíus del monti. Alas vezis, ni essu. Estamus más entreteníus quitandu la çalea del amigu, juegandu en quartus escurus o tirandu retratus paque julguin si assienta bien el vestíu nuevu mentris que se desgañota la naturaleza.

Ena Sierra Gata la tierra lloró ceniza i agora los chabarcus i las presas son çumacalis negrus d'agua envarbascá. El tristi caraval, el tocón renegríu i el suelu gris emporcarun los regatus i las presas las empiconarun: el ombri i el animal que d'ellus bebin no puei por menus que enfuscal-si. I más anguja vel Taju vestía de manera tan charramandusquera, comu una estremeña de sevillanas, con el tragi de camaloti i la peineta d'ucalitus. Sin remediu, s'acoguta entre las prieguis duna yerva folastera dispués de perdel los pecis provincius i la sombra i la vida delas sus riberas. Quien osserva el sitiu ondi vivi, no atolera tantas larzinas contra él. Amigu letol, si premitis agora que la tierra llori, no te quexis si endispués s'enfaa contigu.

Las pieras d'Ojalvu

Piera con crus en Ojalvu. Ismael CarmonaEn metá del Valli de Xerti se hallan las ruinas dela Campana d'Ojalvu, unu delos muchus puebrus estremeñus que descayerun pola enfermedá i la emigración.

El puebru d'Ojalvu se halla junta la carretera del Valli, de frenti ala gasolinera de Val-d'Estillas. Lo mientan en el Libro de la Montería (s. XIV) en palrandu del Piornal, con estas palabras:

La Dehesa de Piornal es buen mõte de Oso en verano, e son las bozerias la vna desdel Piornal fasta en Ojaluo, e la otra de Piornal a Castañar d[e] la Cepeda fasta el Rio.

El nombri de Ojalvu dimana delas palabras oju i alvu mentau del terrenu. En tiempus medievalis, la palabra oju tenía el sentíu de “chapinal, bamburral” i lo encontramus en otrus lugaris de ponienti comu en Portugal (Olhalvo) o mesmu comu apellíu. El segundu términu, alvu, es el ajetivu latinu albus, es dizil, “brancu”, palabra que se gasta muchu ena toponima estremeña, lo mesmu alvu que brancu quandu se refieri alas aguas. Cosa que está polo claru al estal an pie dela Garganta del Bonal i del ríu Xerti. Esta palabra en tiempus más rezientis puei parecel escrita comu Oxalvo o Oxalbo, peru etimológicamenti es con j. 

Por la hechura delo que quea del puebru mos pareci que se trata dun pobranchu mediaval hechu porcima delos plaus i novillerus dela garganta del Bonal. Devía de tenel un caseríu chicu i esparramau con grandis corralis i uertus entre las casas, estuviendu el nucliu prencipal ondi agora se concentran los restus al pie dela carretera.

En esti núcliu entovía quean en pie parés de pieras i esquinas de media ozena de casas quandu menus toas de mampostería con cantería enas esquinas. S'aprecian un par de callis ena parti más alta, delas que quean la conseña de varias casas sin medianil con restus de parés, mejol conservau enas esquinas, peol enos uecus de ventanas i puertas. El arrisgu de ruina es continu, tuviendu pañus despressus ca ves más seguíus.  

Delos materialis delas viejas casas ai un secaeru de pimientus, agora vivienda i varias costrucionis que'l ayuntamientu de Val-d'Estillas apreparó pa recreu, peru que llevan tiempu cerrás. Essa metá está auténticamenti envarbascá.

Delas ruinas delas prencipalis casas, se destaca la fachá dela vivienda que da al sul, malamenti en pie i de la que se conserva la puerta d'entrá conas tablas del postigu a peaçus i una delas ventanas a la su isquierda que dava a un quartu. Se conserva la pintura branca i colorá del bastiol dela puerta i la ventana.

Delas casas ala derecha, se conserva un peaçu de calli que da pa salienti, más que ná los pañus dabaxu i las esquinas, enque la fusca i el ripiu quasi que no dexan vel ná. En una delas esquinas se destingui el esgrafiau, partis del çócalu i las camas de pintura. 

Permaneci entera una cantarera o hornichi en una delas parelis cona toça de maera compreta, tó un exempru de aprovechamientu del espaciu enas casas tradicionalis del Valli.

Ena parti frontera que da pa ponienti no quea quasi que ná. Ahondarun un caminu i ena barranca entre'l caminu i el cerrinu ondi está el puebru se vén las parelis de piera i angunas separacionis cona mesma hechura que las parés delos uertus i cachoneras del lugal.

Peru el puebru no se quea en essi nucliu. Son muchas las casas que están esparramás por tola parti dela garganta i que desconocemus si son dela epoca o no, peru sí poemus afirmal que están hechas conos materialis del Ojalvu.

La preva la tenemus enas esquinas de cantería de varias casas esparramás pola zona, hechas con sillareju i otras pieras sacás de costrucionis más antiguas. Ajorrandu el cerru del puebru, entre la pessina dun çarçal ai restus de parés i esquinas duna casa. La plaera i las gavias de por allí están hechas de piera, unas de rollu i otras labrás, es dizil, aprovechás delas viejas casas de Ojalvu.

Junta'l puebru se halla un pozu, agora secu, con brocal de piera, del que s'aprecian tres fasis. Una primel fasi antigua con piera más basta, otra cimera más moderna que has un poyu, seguramenti cantarera en tiempus en que el terrenu no estava tan muau comu agora i el más rezienti de ladrillu que has arrematal el pozu en una bóveda que lo tapa. 

Largu ya del puebru, encontramus polas casillas, parés delos uertus, delas gavias o mesmu tirás, los restus de otras viviendas que se perdierun del caseríu. S'aprovecharun pa hazel esquinas de casas, pa alevantal parés nuevas, pa cercal propiedais o pa hazel secaerus, de tal manera que pa conocel lo más antiguu del puebru, ai que envestigal por tol reol, diendu quasi que piera por piera, comprovandu si están labrás, si tienin hiendas, fenefas, símbolus, lavol que en una tardi namás que da pa trael lo más presenteru. 

Estoria que quasi que ya es arquiología, arquitetura que es reciclamientu i naturaleza i olvíu que se comi la memoria del tiempu. Ya ni las pieras son escapás de palral, incultas tras los barzus, canteás contra la tierra, aterrás o tapás polas yeiras. Esti puebru hue el centru, la campana, pal Rebollal i Val-d'Estillas. Cuentan que d'él salierun los sus abitantis por causa del paluísmu i s'assentarun ena sierra, ena parti delas rebollas i los leñus del monti.

Foto 1.- L´enzina saqueá. Acebo. Imagen de Susana Funes.

Foto 2.- Piera con crus en Ojalvu. Ismael Carmona García.

Este diario lo hacemos todos. Contribuye a su mantenimiento

ING Direct - Sierra de Gata Digital
Nº CC ES 80 1465 010099 1900183481

Quandu la tierra llora ceniza