Llevamus muchus añus siendu fabetus ena nuestra lengua, enque, si miramus el calandariu no son tapocu tantus si los comparamos conos añus que en Estremaúra llevamus palrandu essi romanci curiosu, antiguu i lindu que es el estremeñu. Una de las demás lenguas dela parti del ponienti ibéricu, junta´l portugués, el gallegu, el leonés, el asturianu i el xalimegu, lenguas toas palrás en España, unas con reconocencia i otras bregando por ella, ena idea de que en defendiendo lo propiu enriquecemos lo de tous.
Peru velaquí que no son pocus los que, encestaus ena intolerancia lingüística, cumu si huera un campusinu a descuajal una hesa pa labrá-la, se piensan que hazin bien esgalaçandu, reduziendu el beneficiu del ambienti natural al provechu personal.
Cosa apaecía passa conos que, creyendu-si que las lenguas son aparentis namás que quandu se sacan perras con ellas i sirvin pa hazel negocius, se preguntan paqué sirvi el ehtremeñu, el vénetu o el piraha si no ván a acotizal en bolsa i naidi vá a leel librus que en ellas estén escritus porque ai mu poquinus dispuestus a leé-lus. Con essas ideas de mercau, las lenguas grandis se comin alas chicas, perdiendu con ellas colturas enteras.
En Estremaúra, tierra políglota por causa dela estoria que tuvu i delos puebrus que por aquí passarun, semus vítimas tamién dela hambrina, d´essa hambrina que dis, dis: “lo tuyu no vale para nada, lo mío es mejor, por tanto imítame si no quieres tener problemas”.
Precisamenti, ahuyendu d´essi datau arramplón, dimus a Arreparar enas palabras delos viejus, que tentigus s´amontonarun dela gramática castellana i conservarun la propia.
Ena bravés i ena dolçura del ehtremeñu, carrucha ondi viajarun los pensamientus de tanta genti durante tantus sigrus, mos vamus a esparigil, acordando i aprendiendo.
En esti apartiju del Sierra de Gata Digital, vamus viendu, mentris la voluntá no cansi, cómu palran los viejus d´estus puebrus, por mé delas sus palabrinas, la manera de mentál-las i sentí-las, paque no las embuya el tiempu i el escaecimientu que premitin los más nuevus.
Sirva d´aperitivu la frasi “salir las havas cocosas”, sacá del campu, quandu las havas se llenan de cocus i no sirvin dispués de ponel tola ilusión en el cudiu. En castellanu se diría “salir el tiro por la culata”.
Chacho, dispues que me pegué tola tardi de caminu pa dil a vél-la i da-le una surpressa, resulta que me salierun las habas cocosas: estava de viagi con el querindongo.
Este diario lo hacemos todos. Contribuye a su mantenimiento
ING Direct - Sierra de Gata Digital
Nº CC ES 80 1465 010099 1900183481