Ai un reflán que dis aquellu de "el perru i el niñu, andi le dan cariñu", peru si no mos tenemus cariñu, quitamus el salúu al paisanu que passa por nusotrus i royemus detrás dela genti quantis que poemus. Cómu dimus a dal cariñu a un animal?
Entre perrus de caça ahorcaus an pie delos caminus i la cría d'animalis comu si hueran aobis en un mencal, no sé cómu poemus tenel el cinismu de dil al comerciu pa mercal pechugas dun pollu que no pisó el campu ena vida ni vidu las miñocas ena tierra. Sin embargu, lo bichamus.
No m'estraña que una manera de luchi contra essi castreu animal sea el negamientu a consumil produtus que vengan delos animalis, si en algu queremus respetal el ambienti.
No es cosa duna coltura o un pensaeru anti los animalis namás: es una refressión de que'l mundu ondi vivimus, desmandau i dislocau de más, mos lleva a estempanal contra la paré del conocimientu el medèn ágan .
No es que los animalis sean "pessonas no umanas", es que nusotrus semus "animalis", es dizil, seris animaus, seris vivus, comu otrus muchus, essu sí, cona soberbia suficienti comu pa pensal velaquí sel los que estamus por cima de tós. Sin embargu, religionis i colturas de tol mundu vienin del cudiu i el mieu a essus animalis, d'ellus dependemus i con ellus vivimus.
Ençurronaus en unas lindis impropias, no se cansan los ayuntamientus i los goviernus d'esplotal perras pa torus i caça i que críi un buen pelitasqui enos letrerus o enas mesas, mentris que apregonan aquellu de educar en valores .
Avía enos antiguus un respetu i un valoreu del ambienti comparanti con el que tenía con él propiu: sabía que las presas enas comías eran escassas i que del suelu i del arvu comían los animalis tós.
Pal ombri modernu, el arvu es aquellu que estorva al aparcal i el animal lo conocerá polos cagalis en el encerau. Comu dirían los mis alunus: estamus apalominaus.
Este diario lo hacemos todos. Contribuye a su mantenimiento
ING Direct - Sierra de Gata Digital
Nº CC ES 80 1465 010099 1900183481