Los caprichus dela Alministración

6 de octubre de 2015, 10:00

Qué hurguiña se cosconea por drentu que sea escapás de movel las palabras paque salgan por aquí? La verdá, es que muchas vezis es la desazón. Otrus los descalientus. Las alegrías, escassas comu los buenus amigus, en ves en quandu tamién salin en esta coluna.

Esta semana es una mesclorancia delas dos primeras con una poca de pimienta colorá. Amigus letoris, ya que llevais un tiempu siguiendu las palabrinas d'esti muchachu disconformi, vos confessaré declarámenti que ya no ai consuelu ni ena Providencia. Contri antis assemilemus que semus títaris, juguetis delas voluntás de otrus, enantis sabremus qué hilu cortal pa safal-mus.

Es indinanti que los professoris suframus los caprichus dela Alministración i que los zagalis sean ratonis ondi preval los esprimentus legislativus. Ca ves encontramus más professionalis dela educación echaus a perdel en desajustis i caprichus de listas entre vagantis desmarriás i sustitucionis desnaturalis, celebrus que s'acessan en esposicionis ondi se premiti entral o salil sigún digan darriba i no formi s'afuercin i muchachinus que'l únicu sueñu que tienin ena vida está enos pogramas de chinchorreu dela teli. Ena jerarquía dela Educación, lo que menus importa es la propia educación.

Ata óndi suportaremus? Tamién ena sufrencia i ena indinación s'aconchava unu i acaba por sel el estau natural delas cosas. Conformidá i ressinación conos disloquis alministrativus i el ave!, cantiquiña del estremeñu padecíu, encontramus ena salas de professoris.

Cómu vá a creel unu ena Providencia, en el Karma o en toas essas palabras delas que mos palran los sabius, si ca ves entendemus menus el mundu que vivimus? Namás mos sirvin las palabras delos antiguus quandu dizían que al ombri namás puei passal lo que es propiu del ombri. Mucha huerça tendremus que juntal pa sel escapás de mual las cosas. Más mesmu que p'atolerá-las.

Delas cosas corrientis

Platón, gastandu de Sócrati, mos truxu aquella frasi de "pánta khoreî kaì oudèn ménei", que cientus de muchachus nunca comprenderán por no sabel griegu ni importá-li tapocu.

I resultará tristi que Eraclitu, que tantu mentavan los antiguus, no lo conoçan porque no juegava a fubu (Monty Python, sé que lo hizistis bien, peru ni con essas) ni tapocu salía empeloti ena teli. Sin embargu, comprendía el mundu mejol que muchus científicus d'ogañu i, enque namás tenemus dél retalis esfarrapaus encustraus en escritus aburriblis, ai más verdá en ellus que en qualquiera libru de testu d'estitutu.

Dizin que consagró el su libru ala diosa, dandu que no lo divan a entendel los ombris. Essu hazemus agora cona joventú quandu, desaculandu-mus d'ellus, reselvamus las verdás no huera a sel que no las entiendan. I assín, distraíus i entumíus, hazemus que s'encorchin ena apatía, el desganu i la galvana.

Qué poía passal si, de ves d'esperal d'ellus lo mejol, hazemus que den lo mejol d'ellus? Cá! Cómu se mos puei ocurril essu quandu hazemus más fé eno que mandan dizil otrus? Ara, dispués que matemus en ellus las ganas de ahilal, de bregal i el geniu maginosu escapás de mual las cosas, no vengais llorandu: total, si el mundu á estau enfuncionandu assín siempri, pa qué siquiera molestal-si?

Alogu palramus dela "Cenicienta Extremadura" i la mangria alaga el pechu. Alo primeru es mangria, denseguía, coragi, peru comu no sabemus qué hazel con nenguna d'ellas, mos embaímus i buscamus entretengas en el mobi o enos pogramas dela teli.

Alo mejol sabel qué dixu Eraclitu no tien importanti pa cogel cerezas, trabajal en una cinta o en un despachu, peru ayuará a comprendel que ata las penas se desparecin con el correl delos tiempus, que'l aginaeru s'insuelvi i que las cosas, por mu embilortás i esvarizosas que estén, no es que puean mual anguna ves, es que por huerça muarán. Avoluntai-vus!

Retrataura 1.- “La Educación prohibida”.

Retrataura 2.- “Cholrera delas Nogaleas”. Nava´l-Conceju.