No sé qué resulta más hartibli, si que qualquiera ámbitu dela vida esté teñíu dun tiraeru políticu o que lo esté ideológicamenti. No atinu a abrigual si el mundu delas ideas i las marcas es más vieju que'l ombri o si la sociedá está a labral-mus pa tiral sigún el surcu la simienti duna idea o d´ootra. La necessiá de pretenecel a un bandu de pessonas o a otru o a otru casa mu bien cona seguidumbri duna idea.
Con tantas pessonas que semus es impossibli que aigan tan pocas ideas. Ondi quean essas grandis ideas que chalpiscás de sangri ondeavan enos estilis? Ondi cayó la idea de mual la mondicia? Qué passó con essa idea que saltó ena taverna entre cerveza i cerveza? Pos qué sabemus allá! Agora son risorius i alicantinas delos librus d´estoria. Comu las pomporitas que cedin el airi a otra pómpora más grandi, lo muchu quea en pocu i el ordin no está ena variedá armoniosa, sino eno únicu monótonu.
Lo simpli tamién hue compricau una ves. Lo mesmu semus expertos en tó que especialistas ena menuencia más menúa, mentris los pareceris racean a ca ná polas pantallas i los arradius, peru da la concidencia de que muandu las palabras dizin tós lo mesmu.
Ata nel viagi místicu delas jiras i romerías de san Isiru sedrá un huelgoriu sacau duna lata i comíu con palillus. Essa eleuthería que los coraçonis del sigru XXI quierin de sentil i que enllenava lo mesmu antañu comu ogañu la boca delos hablaoris, namás es un insueñu. No sabemus si otra Pandora vendrá a quitá-li la tapa paque acabemus de vel venil los malis, que pa essu quearun agachapá la elpís, la espera.
A pocu a pocu las parés, las enzinas, las torrucas, los buhíus, las tierras empanás, los ríus ván cogiendu colol, peru no el dela postura de sol: se colorean delas ideas delos ombris que vén el mundu por mé duna colaera.
No se susprendan si a perru parau el puebru paici más bonitu. Ya tienin ustés un bandu?
Agua, dios, i venga mayu
Dizía el reflán aquellu de "agua, dios, i venga mayu, que yo buen dineru ganu". Pal casu que mayu ya pasó i con él abril i no cayó ni una pinguina d'agua.
Los tractoris enas tierras sequientas alevantan polvareras que, dendi largu, parecin remolinus, demientras los labraoris miran escamaus parriba, no sea cuentu que caiga anguna tormenta que çalei las matas rezién puestas i la frutina que vá engordandu ena rama a basi de química pa salil al mercau estaramandu. En esti mundu ahilau, ya ni los reflanis sirvin.
Agora tendremus que sacal reflanis nuevus comu "quandu vien mayu secu, saca el alérgicu el moqueru" o "si la capuchina te hurga, es que ya vien l'azituna" o "si quieris que la fruta abangui la rama, agarra i echa condumiu nel'agua", que sonan muchu más modernus arreglu a comu está el campu agora. Quiciá que'l goviernu que entra agora ajusti angún publicista que dé la mañaná a escrevil reflanis nuevus dispués de convenius conas industrias delas curas. Qué sabemus allá!
Peru da lo mesmu, porque ni el ombri vá formi el tiempu ni el tiempu formi los reflanis. Doi que deverían de ponel ya el letreru de "biohazard" an pie delas parcelas que alvierta al andarín, al retratista o al correol que pisa tierra con grandi arrisgu pala salú, comu quien s'acerca a Chernobil o pisa un campu de minas.
Ya dendi angunas coperativas lo hazin i no faltan los artolanus que encravan el letreru de "rezién curau", a trocu de que no se llevin los tomatis o los calabacinis. Sí, justu comu están pensandu, comu si huera una amenaza.
Gracias que agora en Caçris ai feria i los estremeñus-rocierus puein alargal la "juerga" pallí sin precupal-si polas curas del campu, por si las presas se ván queandu sin agua o si s'aconchavan los goviernus. A si es verdá que dela mesma manera que ai una promovición dela coltura gastronómica estremeña, hazin lo mesmu con dóndi salin los produtus conos que cozineamus.
Este diario lo hacemos todos. Contribuye a su mantenimiento
ING Direct - Sierra de Gata Digital
Nº CC ES 80 1465 010099 1900183481