viernes. 29.03.2024

IX. Febreiru nu ceu da Serra

Novena entrega du nosu astrónomu de cabeceira M42, que nesta ocasión nus insina a observal u ceu duranti u mes de febreiru. Serra de Gata digital ofreci estas miniguías astronómicas en Fala, gracias a Franjo Antúnez; en inglés gracias a Jakki Cosway i en alemán, gracias a Hans Scheyder. Cun elis queremus leval a Serra mais alá du universu castellanu falanti
 

 

FEBRERO 1i Cancer_constellation_map-fr
Cáncer

U ceu se ha oscureciu. Orión ya se nus vai pur u oesti, pero afortunamenti a irrupción de Leo pur u esti nus prometi a chegá da estación du renacimentu.Día 1, as 12 da noiti.

Cancer (cap.7), a menus visibli das constelacions zodiacais, ten a sua estrela superiol, IOTA-CNC, a un poicu menus de 3 palmus i mediu sobre Guijo de Galisteu, i a un poicu mais de 3 palmus sobre Morcillo, ASELLUS AUSTRALIS ( u borriquiñu du sur). A dereita de esta i un poicu mais arriba se poi vel a nebulosa, M44, chamá tamen U PESEBRI o A COLMEA.

Gemenis (cap.7) ten duas estrelas mais brillantis: CASTOR, a dereita de Coria i a 4 palmus, i PÓLUX, a izquerda de Coria i a un poicu mais de 3 palmus i mediu.

Canis Minor (cap.16) ten un-a estrela mui brillanti, PROCYON (a que precedi a u can), a un poicu mais de 2 palmus y mediu sobre Casas de D.Gómez. Si nus fijamus en BETELGUESE, de Orión, nestas fechas a 2 palmus i mediu entre Perais du Portu i Moraleja, i en SIRIO, de Canis Major, a un palmu i mediu entre Huélaga i Moraleja, as tres forman U TRIANGULU DE INVERNU. Ademais, a un poicu menus de 3 palmus sobre Huélaga, está GOMEISA ( a apagá).

Na Vía Láctea, entre us dois Cans, se encontra Monoceros, u Unicorniu (cap.21), con duas estelas situas nas orillas contrarias du Ríu Celesti: ALFA-MON, a 2 palmus sobre Casa de D.Gómez i BETA-MON, a 2 palmus sobre Moraleja. Un poicu a dereita de esta, i a poicu mais de 2 palmus i mediu, se encontra a NEBULOSA DA ROSETA, NGC 2244.

Finalmenti, tamen podemus vel pur esta parti de Puppis, a Popa (cap.22), aunque mui cerca du horizonti. De ela, a mediu palmu i a izquerda de Casas de D.Gómez, tal ve sea visibli NAOS (a navi).

I hasta u mes da deseá primaveira (menus pus alérgicus, claru está).

IX. Febreiru nu ceu da Serra