III Agostu nu ceu da Serra

Agostu nus regala de un modu mui especial as Perseidas, un-a lluvia de trozus du cometa Swift-Tutle, tamen cuñucías comu as Lagrimas de San Loernzu. Aunque podin sel vistas duranti casi to u mes, un-a das milhoris ocasions está entre as 4 y as 5 da madrugá de u día 12 au 13

Capricornus.
Capricornus.

Otru mes cun nomi de emperadol romanu, AUGUSTU. Y pa que non fora menus que Juliu Cesar le concederán tamen 31 días, cuandu a norma era dil alternandu  sei númeru.

A nosa constelación zodiacal de oishi é CAPRICORNUS (cap. 15), un-a das mais pequenas y menus brillantis. Ena noiti du un au dois de agostu, a 1 da madrugá, dibuja un-a especi de triángulu pur a zona comprendía entre u suresti y u sur. Us seis vérticis son DENEB ALGEDI (a cola de cabra), a un palmu sobre Guijo de Coria; OMEGA-CAP a un poicu menus dun palmu a dereita de Morcillo; un poicu mais a dereita, ALGEDI (a cabra), que en realidai e dobli, a casi dois palmus, y muy cerca de ésta, y pur embaju, está DABIH (u afortunau dus matarifis).

Si siguimus levantandu a mirá, dentru da Vía Láctea nus encontraremus a brillanti ALTAIR (águila en vuelu), da constelación AQUILA (cap. 6), a casi tres palmus sobre Puebla de Argeme. Está rodea pur otras duas estrelas cun as que forma un ala, un poicu au norti TARZED, y un poicu au sur ALSHAIN, cuyus nomis procedin du persa “a estrela du halcón”.

A sua izquerda y a misma altura, pero sobre Guijo de Galisteo, pudemos vel, cerca da Vía Láctea, un bonitu rombu de cuatru estrelas, que son a cabeza de DELPHINUS (cap. 15) sendu da agua. Tamen se cuñocin cun u nomi de U ATAUD DE JACOB.

Continuemus izandu us nosus olhus y au adentralnus ena Vía Láctea nus encontraremus cun a preciosísima CRU DU NORTI, que é a estructura du corpu y as alas de CYGNUS (cap. 6). Está  formá por DENEB (a cola), a tres palmus y mediu sobre Torrecilla de los Ángeles aproximamenti; SADR (u peitu), a casi cuatru palmus sobre Villanueva de la Sierra; GIENAH (el ala), a poicu mais de tres palmus sobre Robledillo de Gata, y finalmenti ALBIREO ( sei nomi fai alusión a un tipu de planta), a tres palmus y mediu sobre Calzadilla.

Entre Albireo y Altair se ven cuatru estreliñas alinias da constelación de SAGITTA (cap. 25).

Ena orilla da Vía Láctea contraria a de u Delfín reluci, ena constelación de a LYRA (cap. 6), a quinta estrela mais brillanti du filmamentu, VEGA (águila du desertu), ya cercana au zenit (cap. 3).

Pero u que  agostu nus regala de un modu mui especial son as PERSEIDAS (cap. 9), un-a lluvia de trozus du cometa Swift-Tutle, tamen cuñucías comu as LAGRIMAS DE SAN LORENZU. Aunque podin sel vistas duranti casi to u mes, un-a das milhoris ocasions está entre as 4 y as 5 da madrugá de u día 12 au 13. A sua radianti está au norti da constelación de PERSEO (cap. 9) que en a hora a que nus referimus estará a un poicu mais de dois palmus sobre a zona entre Cadalso y Hernán Pérez.

Que a sorti nus acompañi y a vida nus trati cun dulzura.