Muelti enas rayas
El bicholnu porel compoltamentu bestaldu delas gobielnas dela Mercauropa, por mé dela petición duna jurranchera palos ombris i mujeris que juyin delas guerras, está escuajaringandu el alma i el coraçón delos vezinos i vezinas güenus dela nuestra tierra. Lo tomaremus a atranquiju i lo coheremus a boti i bolea, por si ai que pasal a cobru
Una sentía puesía de Antonio Sánchez Gil desnua el dolol pola tragedía que están viviendo los ombris i mujeris que juyin dela guerra. La farta de memoria recienti delos mandamasis urupeus sobri lo acacíu ena Guerra Civil dela España y ena Segunda Guerra Mundial, mos llena d´estupol.
Esti pueta, que vos traigu oi, ubu la su nacencia en Orellana la Vieja (1944). Maestru mu amigu delus proyetus i esperencias innovaoras dela escuela roal. Tien muchus relatus i poemas i á emprentau dalgunus librus.
M´án escachau el coraçón
Oi, querius collaçus,
viendu nel ordenaol,
me s´á destrozau el alma,
me s´ á escachau el coraçon,
me s´ án regüeltu las tripas
i tengu una desaçón
i tengu un n´ajinaeru,
que me llenan de dolol.
Es la imagin d´essi críu
tendíu ena arena,
que me tiene malu
i m´enllena e pena.
Velaile está,
probecinu míu,
le lambín las olas
i paeci dolmíu.
¡Dios mío qué rabia!,
dimi quien á síu.
¿Qué t´án jechu AYLAM?
si eris sólu un críu.
I güelvu lo s´ojus
i guipu a mi nieta
i piensu: jamía
si tú jueras ési
no sé que sedría,
dehuru, de pena,
yo me moriría.
I la igu: ven,
que te quieru muchu
i l´abrazu mu juerti,
la besu i achuchu.
I piensu en su pairi,
co nësti van tres,
pos perdió a otru críu
i a su mujel.
¡Ai, Dios qué amargosa
tien que sel esa jiel!.
¡Me cagüen las guerras
i en los que las jacin¡
i tos los motivus
paque to estu pasi.
Me cagüen los atropellus
de toa esta sinrazón
qu´unus jacin por los cuartus
i otrus por su “religón”,
no respetandu a los niñus
i dandu la espalda a Dios.
Oi, por lo menus a mí,
m´án escachau el corazón.
Antonio Sánchez Gil.
Septiembre 2015.
Este diario lo hacemos todos. Contribuye a su mantenimiento
ING Direct - Sierra de Gata Digital
Nº CC ES 80 1465 010099 1900183481