Alcornoqui en Aldeanueva del Camino
Alcornoqui en Aldeanueva del Camino

Enos mis viagis por Estremaúra ei teníu la suerti de dal quasi que siempre con viejinus amablis que me sabin endilgal las cosas polas que preguntava. Estu mesmu passó el otru día que paré pa Aldea-Nueva del Caminu, ya ena raya con Salamanca, quandu peí endilguis pa vel un alcornoqui que tien la fama de tenel quasi mediu mileniu (que no es paja!). 

En el bancu avían quatru viejus que denseguía se pusun a dal espricacionis pa dal con el arvu. Unu d'ellus se brindó a acompañal-mi porque era pondi echava él el passeu. Le pusi la propuesta de tenel que vel el puebru endenantis del arvu, assinque pregunté por qué cosas se poían vel allí.

Tós quatru m'empuntavan pala piscina. Sedrá que la calol i la canina has que gruñioris, vesitantis i vezinus se metan en el'agua a arremollecel-si comu los garvançus a ca istanti, qué sabemus allá! Se susprendierun quandu dixi que lo que quería vel eran cosas antiguas i delo únicu que se recordarun hue de dos puentis que dizin romanas sin sé-lu. 

Dispués de engamonital-mi con el puebru i de vel que entovía quean muchas costrucionis tradicionalis, fueraparti de avel dos ilesias, que dispués me anduvun espricandu los mesmus viejinus que era porque pretenecían a dos diócesis deferentis, hui pola carretera de Val-de-Matança en cata del alcornoqui. 

Formi aporté, la imensidá del troncón i el grandol delas verrugas me hizun chicu, más umildi i más serenu. Los añus que tien i reçumi velallí vida pondiquiera: páxarus, chicharras, grillus, escarabajus, polillas, morgañus. 

Me pregunté si el alcornoqui enormi tamién que está al lau saldría duna delas sus bellotas. Namás una mala saca dela corcha le dio essi espetu esfarraguau i pelibotu, peru la sensación que has es la de encorujamientu. 

Demientras, cientus de roblis i castañus siguin siendu arrancaus pa hazel gavias i caminus i el enzinal passa de hesa a pastizal en essi afán nuestru de contribuíl a que Estremaúra se desertifiqui. 

Es que no tenemus bastanti conos inciendus?

Foto.- visitambroz.com/galerías/pueblos-aldeanueva-del-c-/2/

Este diario lo hacemos todos. Contribuye a su mantenimiento

ING Direct - Sierra de Gata Digital
Nº CC ES 80 1465 010099 1900183481