sábado. 15.06.2024

Quién dixu castúo? (I)

Muchus delos que están en el mundu delo estremeñu tien conocencia dela palabra castúo i no es ralu que la gastin en quijiendu dizil estremeñu, abarullandu dambas a dos vozis. Es mestel tesal una mijina pa comprendel que castúo no tien ná que vél con custión lingüística nenguna. Muchus no tendrán conocencia de que castúo no es una palabra populal, sino un enventu literariu

Retrataura de Luis Chamizo
Retrataura de Luis Chamizo

Lo que es que el castúo, por sel una parabra deferencial —quiel dizil estu que no mienta geografía, ni gentiliciu, comu has estremeñu—, lo tienin por corrienti los que dan cuenta delas palras estremeñas, a estilu dun bable o la dun baturro. La genti, afanosa en assental los hitus i dizil lo míu es míu, tuvun a bien que cona parabra castúo mentaran las  estremeñas. A estu vinu el sostribu de huera, de las vozis no estremeñas que prencipiarun a llamal castúo a la nuestra manera de hablal, no sabían qué.

Es mestel tesal una mijina i retrayendu-mus a lo primeru pa comprendel que castúo no tien ná que vél con custión lingüística denguna. Muchus no tendrán conocencia de que castúo no es una parabra populal, sino un enventu literariu —los espertus se repapilan con esti conceutu dela envención.

Quien, por ves primera i que esté decumentau, gastó la parabra castúo hue, velallí, quien la fundó, Luis Chamizo. Pero la dolçura de Chamizo en custión sociu-lingüística no barruntava tan en siquiera el estaramau que s’enliaría. Tiró dela palabra castúo, un neologismu aparenti i reziu. Buen acuerdu, pero Chamizo gastó esta parabrina nel sentíu de castizu i con essi sentíu lo gastó nel su libru “El Miajón de los castúos”. La parabra castúo apareci, velaquí, comu un epítetu dela parabra labraor:

«Qu’estos hombres son los machos d’una raza / de castúos labraores extremeños» (“Consejos del Tío Perico”, 115-6).

«Son asina los cachorros de la raza / de castúos labraores extremeños» (Ibidem, 149-150).

«Los redichos sabijondos se bulraron, / los castúos labraores sonriyeron» (“La viña del tinajero”, 1210-1).

«Se bulraban los señores, se reían / los castúos labraores d’estos pueblos» (Íbidem, 1978-9).

I en otrus laus del mesmu poema apareci de manera comparanti o quijiendu mental al estremeñu-labraol-tradicional:

«Y será campusino mu castúo, / y será labraor, ¡qué duda cabe!» (“El porqué de la cosa”, 445-446).

«Que por estas señales se conocen / los muchachos castúos de tu tierra» (“El chiriveje”, 721-2).

    Por si enas poesías no queva bien craru qué quería dizil Chamizo con esta palabra, diva añexa a la primel edición un apendi de palabrinas estremeñas, gastás i no gastás ena su obra, i es estu velaquí lo que quería dizil quandu palrava de castúo, pa naidi perdel-si:

«Castúo: Castizo. Mantenedor de la casta de labradores que cultivaron por sí sus propias tierras».

Essu, señoris, senifica castúo, ni mas ni menus: el que con suoris púu ahilal palantri con el cachinu de tierra i poel assín queá-la en erencia, ala contra delos jornalerus que estavan a trabajal enas grandis fincas los señoritus, delos pastoris que vivían en choçus, delos artesanus, delos cacharrerus comu su pairi, etc. Essi era pa Chamizo el modelu de estremeñu-trabajaol, un ombri que supu i púu vivil dela tierra. Mas palantri destiendi esti usu, ajorrandu el sentíu de labraol delas propias tierras al del machu o hembra estremeñus “de pro”:

«Y hogaño / Hay luto en la dejesa, que se ha muerto, / va pa dos meses, Agustín Valdivia, / que era un castúo y un amigo nuestro.» (Las Brujas, 1579-1581).

«Y un día y otro día: [la hilandera] firme, castúa, / juerte, serena, / blanca como las flores de los jarales, / limpia como la costra de las camuesas […] (“La jilandera”, 43 y ss).

«Puño e Jierro: ¡Asín jacen los hombres que son hombres / y tién un corazón drento del pecho! / Silverio: ¡Pero mu bien; asina son los hombres! / Pueño e Jierro: ¡Asín son los castúos extremeños!» (Las Brujas, 1686-9).

En denguna de estas obras se dizi que el castúo tenga ná que vél cona lengua, pos Chamizo quiel dinifical la parabra que enventó pa llamal los estremeñus, atijandu-la al estremeñu que es trabajaol-cristianu-buenu. En parti denguna está essu de “hablar en castúo”.

Pero como cosa curiosa, venti añus dispués de vel-si sacau “El miajón de los castúos”, Santos Coco, en el su trabaju de decumentación lessicográfica, que hue sacandu a pocu a pocu ena Revista del Centro de Estudios Extremeños, nel númiru XVI, de 1942, mos cuenta, velaquí, estu:

«Castúo, adj. Con valor de sustantivo. Castizo, típico del pueblo extremeño. El natural de Extremadura, que conserva íntegras y puras las cualidades y los caracteres de la región. Chamizo, en “El miajón de los castúos”, lo define así: “Castizo, mantenedero de la casta de labradores que cultivaron por sí sus tierras”. (En toda la provincia de Badajoz).»

En 20 añus la parabra castúo passó a sel sinónimu de estremeñu cona moa que crió Chamizo i amás, Santos Coco, cuyu léssicu, acordi ala época, no es rigorosu pero da bastantis buenus endilguis, mos dis que se da en tola provincia de Badajós. Sin embargu, tapocu asseñala ná de lengua. Amás, la parabra castúo no es tan corrienti como pareci, pos ogañu, la genti no leía dela provincia de Badajós ni tapocu la de Caçris sabin qué senifica castúo i rala ves sea la que lo án oyíu como no huera por mé de alguien mas nuevu.

Pegamus un bincru i mos espetamus pal cabu los sesenta, onde el señol Emilio Díaz Díaz saca ena Revista de Estudios Extremeños (XXV, 1969) un articulinu a tentu del léssicu estremeñu entitulau “Apuntes de nuestro castúo hablar”, que desquitando el ámbitu filológicu pocu tuvu que destendel-si entre la genti. Lo que susprendi es que pareci sel una de las vezis primeras en que apareci decumentá la espressión castúo hablar, pero, es essu castúo hablar, gastau como un aljetivu i senificandu otra ves “castizu”, “castizo hablar”. Pero como aconteci en estu del estremeñu (i pa prejuiziu, mas vezis delo comenienti), las malas leturas crían malus usus.

Este diario lo hacemos todos. Contribuye a su mantenimiento

ING Direct - Sierra de Gata Digital
Nº CC ES 80 1465 010099 1900183481

Quién dixu castúo? (I)