Está el silenciu valoreau por demás. Muchus sigrus vendrán de silenciu. Aprendemus alos zagalis a que lo guardin paque no atrubilin el nuestru açogamientu cotidianu más dela cuenta, peru, por otru lau, dexamus que los cochis se desgañitin, que las bozinas retumbrein i las serenas, las grúas i otrus estrumpicius desagradablis mos desapartin delos sonis dela naturaleza.
Ponemus tantu empeñu en callal los más chiquinus comu en callal el cantíu delos páxarus o el guarrapeu delas ranas. Silenciamus las bocas, peru en verdá atorgamus que'l entendimientu s'añúi i se hunda la precisión de pegal un carpíu llegau el momentu.
Amus alevantau parelis, paque no mos estorvin la vista del cielu, mos hiedin los níus delas andorinas porque'l barru çalea la puerta o mos mancha el cochi i mos indinan los çapaterus a volal enas rejillas.
Vivimus fresnéticus i, en mandandu callal, hazemus por sentil los nuestrus pensamientus que, sin embargu, no tienin ná que dizil, assinque ponemus la teli.
Ca animal tien el su son: l'abeja zumba, curichea el perdigón, la cigüeña hazi el gaspachu... ata la oveja berrea, peru nusotrus callamus. Preferimus que las máquinas palrin por nusotrus i si anguna ves naci en nusotrus la precisión de palral, mos desahogamus estripandu botonis o desbrochicandu en anguna taverna.
Siempri tendremus angún momentu d'esparegimientu p'aprecial los colorinis delas callis, delos escaparatis i alabal-mus, peru nengunu pa salil al campu i cantal ala par del chichipán lo que los ombris no quierin oyel. Sin embargu, ata las agua-nievis se quexan enas ballestas, peru nusotrus, por mu entallaus que estemus, el gritíu s'ahoga enantis de salil, mos apotronamus i mos arregostamus.
Hagan lo que hagan con nusotrus, destinati obduramus, peru claru, sin essa parti eroica del estoicismu, más bien perdíus enos lavarientus, de pensal no semus escapás, pa qué molestal-si? Oveja que berrea...
La hulera del iphone
Dizía Einstein, dis, que avía dos cosas infinitas, el universu i la tontuna del ombri, peru que no era ciertu delo primeru.
Sin embargu, a essa tontuna ai que añidil el peligru cambaleónicu d'aparental i no sel, algu mu propiu daquí. I essu no quearía más que en un risoriu propiu del typical spanish, ondi crein que están representás colturas milenarias, si no huera porque ai una menti sota a dal proponimientus i endilgus.
Si mos pensamus que'l ombri d'agora, tan modernu i aparenti, tan apreparau académicamenti, está apreveníu delos retoliquerus i palraoris con venceju por vivil ena "sociedad de la información", las marramus toas. Hazi muchu á, Eraclitu ahurreó ala polymátheia, es dizil, estal impuestu en muchas cosas, porque no mos enseñava a tenel cabeça.
Si agora que estamus enteraus delo que passa ena otra parti del mundu, mos embaímus conas apps i los zagalis aprendin a contal enantis en ingrés que ena lengua materna paque sean grandis emprendedores el día de mañana, cómu no vamus a estal aboecíus? Nunca enantis á bistu tanta deferencia entre una generación i otra, peru que essi andal entrepetau i a zancajazus sea el más aparenti, entovía mos quea por vel.
Sin embargu, vengu osservandu que ena cueva de Platón ya no cogi la genti a vel las sombras movel-si polas pantallas del iphone i que muchas hurrancheras con enganchi pal wifi están encargandu ya robacorrientis p'abastecel el personal que mira aginau el santinu dela batería amenuyendu. Clissaus comu están, no puein meneal-si. La lumbri i la lus en essas huleras tienin marca comercial i enas partis más solóbrigas cain de continu gotinas con el son delos nombris delos partíus políticus.
En fin... enque esté el tiempu duru de llovel, la florencia delos frutalis estrumpi los campus, los jarcintus aflorecin enas macetas, los gamonitus enos vallaus i an pie delos caminus i los páxarus hazin la ruea.
Este diario lo hacemos todos. Contribuye a su mantenimiento
ING Direct - Sierra de Gata Digital
Nº CC ES 80 1465 010099 1900183481