Hola abuelo –saluomi en mi nietu-, ya estoy aquí. Nun t´aguardaba tan prontu, m´as teníu tola mañana enreau cula cañá de Gatta. ¿Y qué tal, abuelo?. Bonu, dalguna cosina ai, peru nun tengu claru si vá selti d´utiliá.
Estará libre de paso la cañada –siñalú el nietu míu, que é mas´espibilau quila gazuza-, porque el profe nos ha dicho que eran cogidas para siembra por los agricultores y también que había muchas riñas porque las ovejas se comían los sembrados.
Pulesu surgi la Mesta –le contesté-, p´organizal las rutas de pasu y pastu, protegel las mielgas, evitandu griescas entri pastoris y agricultoris y daris solucionis a lassus cuitas. Cuandu to pusuisi bandarra y queasi enmurruñau o deradíu, ellus lu hazin esclareciu y recadeau.
En mili doscientus y trenta y dos, el rey Alfonsu el Sabiu, mandó hazel el Honráu Conceju de la Mesta. El Conceju queasi formáu de dos alcaldis deca cuadrilla o cabaña, representandu a las cuatru cañás realis más importantis: León, Soria, Segovia y Cuenca.
Estus´alcaldis de cuadrilla portansi comu si fuerin juecis y s´abía qui dil a juiciu, en´apelación, fuessi el´alcaldi d´alzada. Un procuraol ubu anca parti, que hizian de fiscal d´unu y defensol de l´otru, según lo fuerin, ayudáus pulus receptoris. Del funcionamientu del Conceju l´encargarun al´Alcaldi Entregaor Mayol, cun desinación Real, apoyáus pulus Alcaldis Entregaoris, qu´eran juecis de lu civil y lu penal. Endispues del´añu de mili quinientus, méntasi tamín Presidenti, el mas´antigu delus miembrus del Conseju Real. Tamín ubu un cobraol.
¿Sabemos de algún caso aquí en la Sierra?. Ena nuestra Sierra. Unu nun, muchus casus. Con uno me vale. Fijatí –siguí-, comu nun ai dos sin tres, daiti tres. Abuelo me vale con uno. Buenu daiti tres y t´avíu unu. ¡Qué pesado eres, abuelo!. Mira he oído hablar del pueblo de Almenara. Cuéntame un caso que ocurriera en ese pueblo.
Aguarda qui buscu ena mi libreta. Acuí al cualtu contigú siguru que dib´a topal cun pocu menus que na. El goíu muchachu abía elegiu, d´entre toas, lamas enrebesiná. Tolné con un´estaribel de papelis viehus, unus que dejomi el´abuelu míu y otrus c´arrejunté yo. El nietu míu queó enreau, mondandu colus deus de la manu una naranja. Nun engorras el tiempu, ¡eh! –le diji. Es que están muy buenas –contestomi.
Buenu al meollu –diji golviendu al tema-. Cadahalsu, Zillerus…, no estu nun é, tien que sel más p´atrás. Almenara. Velequí. Mira, Almenara de Gatta. É una foltaleza pal´unvíu de siñalis a las´otras de la Sierra: las´Erjas, Jálama, Treveju, Robledillu, Santibañis…, güe de la Ordin de Arcántara, d´antigu de San Julián del Pereiru, y del maestri Benitu Suáriz, dalgunus dierunmi cumu datu l´Ordi del Templi, allá el´añu de mili cientu y seis. Enel añu de mili quinientus ochenta y unu queó abandoná y ruinosa.
¿Qué año fue el otro abuelo? –preguntomi, munchu interesau, el muchachu-. ¿D`Alcántara?, velequí lu tengu –contesté yo-, el mili doscientus y treci. Pues todavía no estaba el Honrado Concejo, abuelo –diju en´entelegencia el mi muchachu.
¡Chachu!, t´as queau cuna tema ¡eh! –díjili yo, más algullosu qu´el rey d´espás-. Peru sí abía la Mesta. Velequí lu c´ai sobri l´Almenara, é luqui relatarunmi:
Palrárunmi del frey Melen Suaris, qu´staba a la voz del Rey de Portugal, qu´esforzasi en´asedial las nuestras fortalezas c´abía en la raya, cumu juerun Santibáñis, las´Erjas, Salvaleón y la Torri de l´Almenara y nun contentu cun´estu diosi una vez pu las Tierras d´Alcantara y de la Serena, pa´mprincipial aseguandusi las fortalezas aquellas.
Lus caballerus castellanus nun gustasin d´aquel Rey y quearun en siguil la voz del rey nuestru, Enriqui Qualtu, con el caudillu Diegu Martinis, claveru de l´Ordi, qui, cun lamas genti c´ajuntal puu, toitus de la su misma voz, peleó contr´aquel maestri y l´avientó d´Alcántara y del maestrazgu.
Güe el tratu jechu entri don Garci Álvaris de Toledo, duqui d´Alva y don Alonsu de Monroy, datau y signau a ventiunu de setiembre de mili cuatrocientus setenta y cuatru, pul qui va primeru queosi conel condau de Coria y el´otru de maestri de l´Ordi.
Peru ya´staban alreol lus duquis d´Arevalu y Prasencia qui querían el maestrazgu pal hiju suyu, de nombri Juan de Zúñiga y Pimentel e impretarun la bula de reservación de la provisión del Maestrazgu, pulus encontrus tan riñius y sangrientus entri el maestri don Gómez de Solís y el claveru don Alonso de Monroy. Enllegandu la hora de la vacanti tolnarun a suplicali, a la Santiá de Sixto Qualtu, el miramientu pal su hiju. Y mira tú por´ondi, el Pontífici le fizu casu y le dari el Maestrazgu pul vacu y mentosi por administraor al su padri, don Álvaru de Zúñiga y Guzmán, duqui qu´era d´Árevalu y Prasencia, pul nun abel, el hiju suyu, lus´añus pal ábitu. Nun supu el Santu Padri qui ya lu era don Alonso de Monroy y qui tamín andó detrás dél don Franciscu de Solís.
Peru nun acabosi to aquí, el duqui siguió la voz de doña Juana la Beltraneha y les emprestó el su palaciu pal su casamientu cun don Alfonsu Quintu de Portugal. Enfadansi lus nuestrus Reyis Catolicus, Isabel y Fernandu, y recoñocin al claveru don Alonsu de Monroy cumu maestri de l´Ordi d´Alcántara. El´alcaldi de l´Almenara de Gatta, andó con priesa y endilgó la fortaleza al Zúñiga y enu mismu andó con Santibañis. Peru velequí que lus nuestrus Reyis hízunsi amigus delus´Arevalus y de nuevu hizun maestri a don Juan de Zúñiga.
Los duquis d´Arévalu ajuntansi cun Hernandu de Monroy, señol de Belvis y Deleytosa, mu enemigu del helmanu suyu don Alonsu, arrejuntandu dos milis hombris y ochocientus caballus, p´asedial y achanal Alcántara y endispués vínensi a la nuestra Sierra, paque Hernandu Centenu l´entregari las´Erjas, que é lu c´abía; Gonzalu de la Prata, la de l´Almenara, dela qu´era el su alcaldi, y Juan de la Cieza la de la Peña de Fray Domingu, a quien la duquesa d´Arévalu dioli las´alcavalas de la Zalza y Moraleja y las yelbas de las jesas de la Parra y la Granja, qu´eran de l´Encomienda de Santibañis.
Siguió en´esti tiempu de mili cuatrocientus cuarenta y cuatru, siendu toas las fortalezas de l´Ordi d´Alcántara, standu pul maestri don Juan de Zúñiga, peru Alonsu de Monroy quisu guerra pulu qu´el maestri tomó por armas la de l´Almenara, tierra de Prasencia y las Casas de Millán.
En mili quinientus y ocho, fue frey Franciscu de Trejo, comendaol de las Casas de l´Almenara y frey Diego de Anaya, comendaol de la Madalena de Salamanca, púsunli lus nuestrus Reyis Católicus cumu alcaydi de la fortaleza de l´Almenara, qu´está juntu a la Villa de Gatta.
Anantis d´estu la torri de l´Almenara güe arrapuñá a lus morus, y tamín el castillu de Santibañis, erasi jecha de piedra, cumu la nuestra egresia, cununa barrera alreol. Tuvu caballerizas, cualtus pa quealsi y torri de homenaji.
Aluegu ubu líus entri don Pedru de Calvahal, de cuandu güe alcaydi de l´Álmenara, y lus vecinus de la Torri y cun lus vecinus de Gatta, qu´eran del maestrazgu d´Alcántara, lus que librarun al dichu alcaydi de pagal lus dañus pul jechus y entregosi la fortaleza a la duquesa d´Árevalu y de Prasencia y al maestri don Juan de Zúñiga.
Velequí, vien to del´añu de mili cuatrocientus cincuenta y ocho y otrus qui le siguín, y tos dasi por contentus y pagaus delu qui capituló el dichu antis Pedru de Carvahal con la señoa duquesa sobri la entrega de la fortaleza.
Peru n´acabosi aquí puqui ai una obligación y finiquitu, d’esta primera duquesa consorti d´Arevalu y Prasencia, doña Leonol Pimentel Zúñiga, a favol delus hermanus Calvahal, pulus derechus y deudas qui debinsi pul´ella y pulus qui otorgosi carta de pagu de don Jerónimu de Caçris, vecinu qu´era de la Villa de Gatta, a favol de lus Zúñiga y lus Calvahal, pul débitus que s´abían cunél. To estu pususi anti escribanu púbricu.
Ubu entavía líu más´alanti pu emprazosi a Pedru de Calvahal, siendu alcaydi de Segura, el cual ubiénduli siu entregá, en´encomienda, por Juan de la Praza, la fortaleza de Almenara, la vendió a la duquesa de Arevalu y Prasencia endispués de robal tolu qu´en ell´abía.
To estu paeciomi abultáu peru é lu qu´icin lus papelis sobri el tal Juan Praza, alcaidi de l´Almenara, osáu hasta el puntu d´encerral a Alonsu Durán, vecinu qu´era de la Torri, en la fortaleza y ubu de dil el su hiju, de nomi Juan Durán, a llevari unas fanegas de pan paqui soltasi al padri suyu.
Güe tan severu enlus castigus c´ubu de llamal-li al´ordi, ni más ni menus, qui don Diegu de Jerez, Deán de Prasencia, pul ruegu qui hizun Martín Fernándis y Juan Domínguis, vecinus de la Torri, quejándusi dequi cuandu el mentáu Juan Praza güe alcaidi de l´Álmenara hizu munchu mal, obrigándusi a lus querellaus, y a tolus vecinus de la Comalca, a sel fiaoris delus diezmus de Villanueva, qu´é del´Obispu de Coria, cuya renta abía arrendau el dichu Juan Praza.
De la Mesta relatarunmi quelus vecinus de la Torri de Don Miguel tuvun cuitas a la hora d´encuentral pastus palus sus ganaus estantis y d´abastecelsi de leña pala lumbri, pulu coltu del terminu suyu, y acudierun a don Juan de Zúñiga quilus autorizó pa pastar, cazar y coltal leña en la nuestra Sierra de l´Almenara y dal-lis terrenus de l´Encomienda paqui plantasin güertus, viñas y olivaris, luqui nun queó na contentus a lus vecinus de lussotrus nuestrus puebrus.
