viernes. 21.06.2024

Felí cumpleanus

U autor de U sitiu Valverdeiru, Antonio Corredera, celebra "brindandu pur estis dois anus de constantis maulhíus, cus que mus despertas a modu de voceiru da comarca.Novimil anus levan us gatus convivindu cun nos i otrus tantus te deseu"

 

Antonio Corredera Plaza durante la entrevista concedida a este diario. ARCHIVO
Antonio Corredera Plaza durante la entrevista

Esti anu me sumu a celebración du segundu aniversariu du nacimentu na ré de redis desti vehículu de comunicación “serragatino”.

Me gusta mais “serragatino” que “serragatuno” porque u diminutivu “gatino” - pa us xalimegufalantis comu ei: “gatinu”- ten un significau que denota carinhu i comu tal me fala de toas as coisas que se facin cu esmeru, cu corazón i que se sintin pur u mesmu comu un gran regalu.

“Gatuno” - “gatunu” pa us xalimegufalantis – aunque tamén ven de gatu, me soa mais a huranhu i pur u tantu sendu repetitivu menus cercanu, mais independienti i que se escondi da genti.

Ditu istu, celebru brindandu pur estis dois anus de constantis maulhíus, cus que mus despertas a modu de voceiru da comarca.

Novimil anus levan us gatus convivindu cun nos i otrus tantus te deseu. Sabis que us gatus sois limpus pur naturaleza i pur u tantu necesitais de poica atención de fora pa mantelvus cu esi lustri que vus distingui.

Sabéis tamén que as pesoas vus temus comu as mais apreciás mascotas das nosas casas i comu nacesti en zona rural te pois movel cu enteira libertai pur tos us lugaris sin dificultai; nun  sería u  mesmu si foras un gatu de ciudai.

Nus cuarteiróns de mutas portas tes u buracu pur u que pois entral i sel a placel, solu tes que estal convencíu de que pois porque son as tuas creencias as que te guían i son elas mesmas as que te podin dal a lu pa seguil u caminhu o mutarsi nus fantasmas que te espantin da tua ruta.

Cu mei brindis queiru desearti a ti, i a toa a comarca serragatina pur a que te movis, un día cheu de muta felicidai, desdi u que se te abra un futuru de muta i mui boa cosecha, pa que podas tamén ronroneal.

Esti é u mei regalu: Un gatu que ronronea porque de ná le farta.

http://www.flickr.com/photos/valverdeiru/8063365731/in/set-72157627885084977

¿Te gusta leer en fala? ¿Crees necesaria su conservación y difusión? Colabora con este digital en la tarea

Felí cumpleanus